ජින් පරිච්ඡේදය දින 40ක් නොකඩවා පාරායනය කලේ නම් ජින්වරුන්ව වශී කල හැකි බව සමහර ආලිම් වරු පවසයි.
ජින් නමැති පරිච්ඡේදය ඇති වා සේ අලියා, කුහුඹුවා, මීමැස්සා, මකුළුවා, ගවයා, මිනිසා, කාන්තාව යනාදී පරිච්ඡේදයන් ද අල් කුරානයේ සඳහන් වේ.
ඉහත පවසූ පරිච්ඡේදයන් පාරායනය කිරීම මගින් ඔවුන්ව වශී කල හැකිද? එම පරිච්ඡේදයට ජින් යැයි නම ලැබුනේ එහි ජින්වරු පිලිබඳ සඳහන් වන බැවිනි. එම නම ලැබුනේ ජින්වරු වශී කල හැකි නිසා නොවේ.
ජින්වරුන් යනු මිනිසා මෙන් බුද්ධිමත් හා මිනිසාට වඩා බලසම්පන්න ජීවී කොට්ඨාශයකි. බුද්ධිමත් බවින් හා අධික බලසම්පන්න බවින් යුක්ත ජින්වරුන්ව ඔවුන්ට වඩා බලයෙන් අඩු ජීවී කොට්ඨාශයක් කෙසේ නම් වසඟ කල හැකිද?
ජින්වරුන්ව සර්ව බලධාරී අල්ලාහ් තආලා විසින් සුලෛමාන් (අලෛ) ට වශී කර දෙනු ලැබිණි. මෙය විශේෂ සුදුසුකමක් බව අල්ලාහ් පවසයි. මෙමගින් වෙනත් කිසිවෙකුට ජින්වරුන්ව වශී කල නොහැකි බව තේරුම් ගත හැකිය.
තවද සුලෛමාන්ට සුළඟ වසඟ කර දුන්නෙමු. එහි උදේ ගමන මාසයක දුරකද, එහි සවස් ගමන මාසයක දුරකද වශයෙන් තිබුණි. තවද උණුවූ තඹහි උල්පතක් (වතුර මෙන්) අපි ඔහු වෙනුවෙන් ගලා බසින්නට සැලැස්සුවෙමු. තම දෙවියන්ගේ අනුමැතියට අනුව ඔහුට වැඩ කර දිය හැකි ජින්වරුන්ව ද (අපි ඔහුට වසඟ කර දී, ඔහුට අවනත වී කටයුතු කිරීමෙහි) ඔවුන්ගෙන් කවුරුන් අපගේ නියෝගයන් ප්‍රතික්ෂේප කරන්නේද, ඔහුව දළු ලා දැවෙන (නිරා) දඬුවම විඳින ලෙස සලස්වන්නෙමු (යැයි කීවෙමු). (තවද) ඒවා (ජින් ආදිය) සුලෛමාන් කැමති වූ නමදුම් පොලවල්ද, පිළිරුද, ජල තටාකයන් වැනි ඉමහත් ජල බේසම් ද, සෙලවීමට නොහැකි විශාල බඳුන් ද සාදමින් සිටියේය. දාවුද්ගේ දරුවනි! කෘතඥ වීම පිණිස (දැහැමි) ක්‍රියාවන් කරමින් සිටිනු. මාගේ වහලුන්ගෙන් කෘතඥ වන්නේ
අල්පයකි (යැයි කීවෙමු).
(අල් කුර්ආන් 34: 12,13)
සුලෛමාන් නබි තුමාට සේවය කලේ නැතිනම් නිරයේ දමා වේදනා විඳින්නට සලවන්නෙමු යනුවෙන් අල්ලාහ් පැවසු නිසාම ජින්වරුන් සුලෛමාන් නබි තුමාට අවනත වී සේවය කළහ. අනික් මිනිසුන්ට අවනත වන මෙන් හෝ සේවය කරන මෙන් දෙවියන් ජින්වරුන්ට කිසිම නියෝගයක් නිකුත් කලේ නැත.
එම නිසා මෙය සුලෛමාන් නබි තුමාට දෙවියන් ලබා දුන් සුවිශේෂ සුදුසුකමකි. පොදුවේ කිසිම කෙනෙකුට ජින්වරුන්ව වශී කල නොහැක.
No comments:
Post a Comment